మధురకవి మల్లవరపు జాన్ శత జయంతి సదస్సుకు ఏర్పాట్లు – ఈ నెల 12న కేంద్ర సాహిత్య అకాడమీ ఆధ్వర్యంలో నిర్వహణ

తెలుగు సాహిత్య రంగంలో ప్రత్యేక గుర్తింపు పొందిన మధురకవి మల్లవరపు జాన్ శత జయంతి వేడుకలను పురస్కరించుకుని ఈ నెల 12న కేంద్ర సాహిత్య అకాడమీ ఆధ్వర్యంలో ప్రత్యేక సదస్సు నిర్వహించనున్నట్లు మల్లవరపు జాన్ మధుర సాహిత్య భారతి గౌరవాధ్యక్షులు డాక్టర్ బి. జవహర్ వెల్లడించారు. ఈ మేరకు చీమకుర్తిలో సదస్సుకు సంబంధించిన పోస్టర్‌ను ఆయన ఆవిష్కరించారు.

ఈ సందర్భంగా ఏర్పాటు చేసిన సమావేశంలో డాక్టర్ బి. జవహర్ మాట్లాడుతూ మధురకవి మల్లవరపు జాన్ తెలుగు సాహిత్య ప్రపంచంలో ప్రత్యేక స్థానాన్ని సంపాదించుకున్నారని తెలిపారు. మహాకవి జాషువా సమకాలంలో జీవించిన జాన్, తన పద్యాల ద్వారా సామాన్య ప్రజలకు సాహిత్యాన్ని చేరువ చేశారని అన్నారు. సాహిత్యం అనేది కేవలం పండితులకు మాత్రమే పరిమితం కాకుండా ప్రజల జీవితాల్లో భాగం కావాలని భావించిన కవుల్లో మల్లవరపు జాన్ ఒకరని పేర్కొన్నారు.

సమాజంలో ఉన్న వాస్తవ పరిస్థితులను, మానవ సంబంధాలను, సామాజిక విలువలను, ప్రజల జీవిత విధానాన్ని పద్యాల రూపంలో సులభమైన భాషలో ప్రజలకు అందించడంలో జాన్ ప్రత్యేక గుర్తింపు పొందారని వివరించారు. ఆయన రచనలు సాహిత్య ప్రియులకు మాత్రమే కాకుండా సాధారణ పాఠకులను కూడా ఆకట్టుకునే విధంగా ఉండేవని తెలిపారు.

కేంద్ర మానవ వనరుల శాఖ ఆధ్వర్యంలో పనిచేస్తున్న ప్రతిష్టాత్మక సాహిత్య అకాడమీ ఈ శత జయంతి సదస్సును నిర్వహించడం సాహిత్య రంగానికి గౌరవకర విషయమని ఆయన అన్నారు. ఈ సదస్సులో పలు విశ్వవిద్యాలయాలకు చెందిన ఆచార్యులు, పరిశోధకులు, సాహిత్యవేత్తలు, కవులు పాల్గొని మల్లవరపు జాన్ పద్య కవిత్వ విశిష్టత, ఆయన సాహిత్య సేవలు, తెలుగు సాహిత్యంపై చూపిన ప్రభావం వంటి అంశాలపై ప్రత్యేక ఉపన్యాసాలు ఇవ్వనున్నట్లు తెలిపారు.

సదస్సు ద్వారా యువతకు తెలుగు సాహిత్యంపై మరింత అవగాహన పెరగడంతో పాటు, మల్లవరపు జాన్ వంటి మహనీయుల సాహిత్య వారసత్వం కొత్త తరాలకు చేరువయ్యే అవకాశం ఉంటుందని అభిప్రాయపడ్డారు.

ఈ పోస్టర్ ఆవిష్కరణ కార్యక్రమంలో జానుడి – సెంటర్ ఫర్ లిటరేచర్ అండ్ ఆర్ట్స్ అధ్యక్షుడు ఎద్దు విజయకుమార్, కార్యదర్శి డాక్టర్ నూకతోటి రవికుమార్, సాహిత్యవేత్త మల్లవరపు ప్రభాకరరావు తదితరులు పాల్గొన్నారు.